谷祖琳（小谷）的甜品店「小甜谷」勁好腳頭，由第一間舖開張之後結婚，到開第二間就懷孕，投資近百萬的第三間分店將在尖沙咀開業前，小谷亦宣佈身懷4個月小B女！雖然小谷家中曾接連發生傷心事，但一切已成過去，她和家人都學會放下，開心媽咪谷祖琳說：「以前未有咁多經歷會好執，經歷令我成長，我?家好滿足，好enjoy每一日！」
採訪：方騫平 攝影：李維隆 眼鏡提供：silhouette
谷祖琳（小谷）由影圈轉戰飲食界，甜品店生意愈做愈好，不過，小谷形容的「小生意」，每月扣除開支淨賺過10萬喎，難怪懷孕的她仍然親力親為，由揀舖到視察裝修從不假手於人，她大笑說：「我唔覺得有就要變女王，家陣好多孕婦都係如常返工，直至產前一個月先去休息，新舖新開張所以睇緊，工作反而係最舒服，希望員工生生性性，咁我11月尾預產期時唔使操心。」不過，她坦承孕婦情緒波動較大，尤其是她頭暈暈，日日都有暈車浪feel，有時忍唔住要食鎮店甜品等自己開心，好似千層酥皮香芒等。難道唔怕會有妊娠糖尿病？她膽粗粗說：「成日做產檢，咁又唔係好驚！最緊要真係令自己開心。」
小谷好愛大家庭，最想生夠三個，不過，當見到社會氣氛變差，有時都會有感而發，愁住同婦產科醫生講：「都唔知第日點教小朋友！」豈料醫生竟給她啟發：「其實生小朋友係由佢教番父母點做人，因為?家小朋友好醒！」小谷明白到做人要有進步，包括思想同行為方面，所以她學會珍惜每一日：「?家有家庭，有喜愛工作，即使唔係有錢，但唔係窮，今時今日我好OK，好滿足現狀，不過為求繼續進步，產後都會保持幕前工作。」
