【on.cc東網專訊】 嚟到九龍石硤尾嘅南山邨，最出名梗係食夠晒鑊氣嘅小炒啦，食完飯要食糖水，是常識吧？呢間新開嘅甜品店糖室，門口同附近嘅大排檔唔多夾喎，入面仲要賣少女最鍾意嘅靚靚甜品，真係估佢唔到。最多人嗌係呢款即烤荷蘭Pancake，Pancake要焗夠二十分鐘，先做到好似個碗咁，上面鋪滿士多啤梨同藍莓，睇見都想食。另外一款老闆推介嘅，係梳乎厘Oreo撻，平時好似一陣風咁嘅梳乎厘下面有紅莓肉同Oreo餅碎，而且分量都大啲，食得夠滿足。
即烤荷蘭班戟配雜莓楓糖燕麥 HK$68：Pancake焗到好似個碗咁，配大量雜莓、楓糖漿同燕麥，配搭好吸引。
羅勒菠羅吐司條配青檸雪葩 HK$44：吐司條上面灑上羅勒同糖，食落香脆，可以配雪葩或者菠蘿醬品嘗。
配合環境想懷舊一下，可以試下呢款心太軟，用細個成日食嘅檸檬夾心餅嚟做，食落唔太酸，味道真係一模一樣。舖頭外面仲掛咗吊床，喺屋邨攤抖一下，慢慢歎甜品，你未試過喇啩。
覆盤子梳乎厘Oreo撻 HK$56：Oreo餅底比較濕，中間係新鮮紅莓，上面嘅焗蛋白就有玫瑰花乾做裝飾。