卜蜂國際(043)分拆生化同工業瓣數嘅正大企業上市,已經進入直路階段。而後邊嘅正大,股權又係近乎密籠。買卜蜂,食呢注大大件甜品。
卜蜂計劃以100送1嘅形式,分拆正大上市,正大資本化後股數最多2.4億股,總發行量,已經唔係大推頭大製成隻。再睇吓卜蜂嘅權益,大股東泰國卜蜂食品,揸卜蜂47.83%,伊藤忠商事揸25%,卜蜂街貨權益只得27.2%。根據呢個比例分派正大,正大街貨權益,得27.2%或6,528萬股咁大把,歸邊嘅情況一目了然!
呢期新/半新股,炒密籠,挾到癲晒,正大街貨細奀兼近乎密籠嘅程度,上市後甚有潛質放紙鳶。但享受條件係,一定要先買卜蜂等派送。
睇番卜蜂本身嘅情況,一啲都唔削,母系係泰國同台灣農業食品界嘅大孖沙,上邊第二大股東伊藤忠,係日本五大商社之一,市值高達1,668億元。啱啱喺上年9月,伊藤忠先以每股1.1元,入股卜蜂。有兩位大超級大孖沙股東,對卜蜂想像嘅空間,認真好遼闊。
再講,卜蜂繼上年turnarounnd,盈利增長35%,到19.6億(港元.下同)後,啱啱派今年第一季成績單,盈利keep住增長33%,到4.3億元。集團主打飼料同養殖瓣數,食住規模優勢,加埋其中主營越南,經濟回暖,今年頭一季GDP增長,就達到6.03%(上年同期5.06%),地區keep住好景,卜蜂今年成績單,繼續靚仔。
係咁意估卜蜂今年EPS增長33%到0.103元,現價(1.19元)預測11.6倍PE,泰國卜蜂食品係講緊近17倍,卜蜂平咗截。買卜蜂等甜品,再追炒阿媽PE水位,講緊要升46%,到1.74元。
資料來源:http://hk.apple.nextmedia.com/